Single Post

أنا اسمي يحيى عبد الغني وأنا كنت مهندس في شركة اكسون موبيل للبترول فرع مصر
أنا عندي 54 سنة حاصل على بكلريوس هندسة الالكترونيات وكمان درست MBA و حصلت على الماجستير المهني فى النحالة الحديثة من جامعه القاهرة.
أنا جذورى من الصعيد تحديدا مركز أبو أبو قرقاص محافظة المنيا
أنا طلعت من الشركة من شهر يوليو 20 21 وساعتها قررت إني أستفيد من جذورى في الصعيد زى الأرض اللي موجودة و الحمد لله متمثلة فى أرض عادية تزرع محاصيل تقليدية زى البرسيم و السمسم و الذرة وعملت منحل.
ليه عايز اعمل منحل؟ لانى كنت حابب اعمل حاجة أنا شخصيا أستفيد منها طبعا لكن كمان افيد الناس وافيد صحتهم لان الصحه هى اغلى حاجة عند اى انسان!
علشان كده أنا فكرت إنى اعمل المشروع و يكون المشروع دة مبني على الفكر السليم علشان الناس تستفيد وأنا كمان أستفيد.
العسل سوق كبير اوي فى مصر اللى بتستهلك حوالي 20,000 طن عسل سنوياً ده غير العسل المستورد .
والعسل ده طبعا جزء كبير منه بيروح للصناعات الغذائية وجزء بيروح الفنادق و جزء بيتوزع فى المحلات الكبيرة او الصغيرة.
‏طيب اغلب المستهلكين الى هما العملاء ،أغلبهم بيروح المحلات و بيشتري البرطمان من على الرف و هو بيعتمد أكثر ما بيعتمد على الكلام اللي سمعه و هو صغير و الكلام اللي اتربي علية وكمان شوية الإعلانات البسيطه جدا جدا اللي بتتكلم عن العسل.
وبالتالي لما العميل يقرر يشترى عسل بتبقى معلوماتة مبنية على كلام من ‏مصادر اجتماعية وخبرات متنقلة لكن ما بيبقاش اختياره مبني على الحقائق العلمية الخاصة بالعسل مثالاً ان اغلبنا كلنا عارف أن العسل المرمل ده عسل مغشوش !
والحقيقة عكس كده العسل المرمل هو عسل طبيعي - لم يتم بسترته او فلترتة - و بالتالى مليان حبوب لقاح و بعض من شظايا الشمع وهي دي احد الأسباب اللي بتخلى العسل يرمل او هي نوات الترميل ‏وبالتالي ده عسل ممتاز جدا وفي كل حتة في الدنيا العسل الرمل بيبقى أغلى من العسل العادي على الاقل بعشرة فى الميه .
حاجة تانية أن اغلب الناس بتحب عسل الموالح و زهرة البرسيم ودول اعسال فاتحة ‏مش غامقه مع العلم ان الاعسال الغامقة هى ذات قيمة صحية اعلى زى السدر و اليانسون و الشمر.

‏علشان كده أنا قررت إني لما أدخل الشغل ده لازم ابقى متميز و أضيف قيمة عن طريق انى أعرف الناس يعني ايه عسل وانى اعرض الحقائق العلمية البسيطه و الاساسيه علشان اللي بيشتري يبقى عارف يفرق بين العسل الكويس ‏والعسل اللي مش كويس بسهولة.
طيب نرجع تاني بقى أنا عملت ايه أنا الحمد لله ربنا وفقني وعملت المنحل و عندي عدد محترم من الخلايا القياسيه وعندي اثنين نحالين لهم خبرة واسعه.
أنا عندي أرض بتتزرع محاصيل تقليدية زي سمسم و الذرة والبرسيم طبعا دة غير السدر (النبق) و أنا بأحتاج انقل الخلايا حتة فيها صحراء لأن السدر أو النبق بيصح في الأراضي الصحراوية أو الأراضي القريبة من الأراضي الصحراوية.
وطبعاً عملت معمل علشان أقدر افرز العسل و تنكات أقدر أخزن في العسل كلها مصنوعه من الاستانلس استيل لضمان عدم تفاعل المعدن مع العسل بتاعي عشان ابدأ اوزعه.
‏كمان أنشأت شركة هنا في القاهرة علشان أبدأ أسوق المنتج هنا في القاهرة كخطوة اولى
طيب أنا بنتج العسل بناء علي أية؟
اولاً العسل لازم يبقى طبيعي:
يعني مش واخد تغذية اثناء موسم التزهير.
‏وكمان ما بديش أي مواد كيميائية أو علاجات كيميائية للنحل علشان الحاجات الكيماوية دي متبقاش موجودة في العسل لو أنا أنتجت العسل بالشكل ده زي ما أنا بقول بس من غير المرجعية يبقى كلام جميل بس بدون اثبات يعني فين المرجعية بالنسبة لنا وعلميا فأن المرجعية الوحيدة هى تحليل العسل الحصول على شهادة التحليل بتقول أن العسل ده سليم ‏ومطابقة للمواصفات القياسية المصرية.
كمان لازم العسل بتاعي يكون طازة يعني تاريخ تعبئة متناسب تماما مع مواسم للتزهير للعسل اللى بنتجة ‏
لأن طبعا العسل ما بيبوظش وملوش تاريخ صلاحية لأن هو منتج يستخدم لحفظ الأشياء يعني الفراعنة كانوا يستخدموة لحفظ اللحمة فملوش صلاحية لكن الصلاحية شرط من شروط التموين والصحة لكن بالنسبة للمذاق كل ما الحاجة كانت طازة أكيد طعمها بيبقى أحسن.
‏كمان حبيت إني أنا اعباء العسل في برطمانات زجاج مش بلاستيك علشان أحافظ على جودتها و انه ما يتفاعل مع البرطمان

‏حاجة تانية كمان مهمه جدا إني أنا اعتمد على أن العسل اللي بنتيجه ما و اللى لم يتعرض لاى انواع الحرارة قصدي بها البسترة أو الفلترة الغير مسموح بها.
يعني ايه بسترة يعني العسل يسخن ‏ويتبرد علشان يبقى قابل للضغط بسهولة من خلال ماكينات التعبئة

وكمان الفلترة لأقل من ١٠ مايكرون و دى وحدة قياس فتحات الفلتر لأن لو فتحة الفلتر أصغر من كده زي ما شركات كتير بتعمل طبعا بتشيل حبوب اللقاح وده من اهم العناصر اللى فى العسل و هما بيعملوا كدة علشان العسل ما يرملش ‏لأنهم عارفين أن العميل عايز يشوف عسل بيلمع وما يرملش كمان طول ما هو على الرف في السوبر ماركت
لكن أيه نتيجه كده ؟
النتيجه كده أن العسل فقد كل الخواص العلاجية يعني الانزيمات و الأحماض و مضادات الأكسدة لما اتسخين وكمان فقد جزء كبير من خواص الغذائية ‏لما اتفلتر زيادة عن اللزوم علشان كدة أنا قررت أن استراتيجيتي في الإنتاج والتسويق تبقى الإنتاج بأساليب طبيعية وكمان التعبئة بأساليب طبيعية زي ما جدودنا كانوا بيعملوا ولكن بشكل عصري وجذاب
في النهاية حابب أقول أن الصحة موجودة في ان احنا نعرف احنا بناكل ايه وإيه المرجعية بتاعت جودة ‏الأكل اللي احنا بنكله